وبدأ العد التنازلى لهدم المسجد الأقصى !!!

السلام عليكم زرحمة الله وبركاته

طبعا مش كل اللي هيقرا الموضوع ده هيديله حجمه وأهميته لأن بلدنا عودتنا ان اللقمة والنومة هي
اللي احنا عايشين عشانه وإعلامنا المحترم جدا عودنا ان بعد الافلام والمسلسلات والاغاني والكورة
كل شئ يهون حتى الأقصى مسرى النبي اللي صلى فيه إمام بكل الانبياء عشان يقول للي قالوا
(لا إله إلا الله محمد رسول الله )- يعني إحنا- ان ده مسؤليتكم

المسجد الأقصى اللي الفاروق عمر قال فيه ( وما القدس عند الله إلا كمكة )
وهل نسيتم قول نبيكم صلى الله عليه وسلم:"لا تشد الرحال الا الى ثلاث مساجد المسجد الحرام ومسجدى هذا والمسجد الأقصى"
انا مش هتكلم كتييير عن المسجد الأقصى لأن قيمته معروفة عند الجميع بس هتكلم على حالنا إحنا اللي مابنغضبش وماننزلش الشوارع إلا للكورة ومابقاش الشباب بيتكلم في حاجة إلا الكورة
بنغضب للكورة ونفرح بالكورة بقى المدير الفني للمنتخب الوطني هو حامل لواء الامة
والعشر لاعبين هم العشر المبشرون بالجنة والجمهور الاستاد هم المهاجرين والنصار صح ؟
وبنغضب كمان لما يغلوا علينا الاسعار ويقللوا الخدمات صح ؟؟؟
يعني بنعرف نغضب لنفسنا كويس أوي وبنعرف نقول اه ونقول لأ ونعمل اعتصامات عشان
الأجور مش عاجبانا ..... بس السؤال بقى ......


امتى هنغضب لدين الله ؟؟؟؟؟؟ وأمتى هنغضب للمقدسات الإسلامية اللي اليهود بتسرقها مننا ؟
مش عارفة
يا جماعة النزاع العربي الاسرائيلي أصله ديني مش سياسي
بصوا هما شعار علم دولتهم ايه ؟؟ نجمة داود ( يعني دين ) بس إحنا اللي مصممين
نفصل السياسة عن الدين ولسه بنوهم نفسنا ان الناس دي ممكن تعمل معانا سلام
والله الواحد بيضحك لما يلاقي تصريح لمسؤل مصري بيقول فيه مثلا :
ضم اليهود الحرم الابراهيمي ومسجد بلال للتراث اليهودي يعرقل عملية السلام
قال سلام قال مش بزمتكم تضحكوا أهو ده بقى اللي يتقال عليه : شر البلية ما يضحك
سيدنا ابراهيم جدنا الحرم بتاعه يرقص فيه اليهود ويقيموا فيه شعائرهم بالبساطة دي وإحنا
مشغولين بماتش مصر وإنجلترا وفيلم أولاد العم أو vatar للي تخصص افلام اجنبي
مسجد بلال اللي هما ضموه لتراثهم بلال !!! بلال بن رباح اللي اتعذب عشان الاسلام هان علينا
إزاي ؟؟؟ إزاي بالله عليكم 6 مليون يهودي في فلسطين يذلوا مليار مسلم للدرجة دي؟؟؟
إزاي نسمح ان اثار اقدام رسول الله في القدس والمسجد الاقصى يطأها اثار يهود ملاعين
هو ربنا مش قادر ينزل عليه صاعقة مثل صاعقة عاد وثمود !! حاشا لله
لكن ده امتحان واللي جي بعد كده كله امتحانات.. انت عملت ايه للقدس اللي فتحها عمر بن الخطاب وحررها صلاح الدين؟؟ هننجح في الامتحانات دي ولا لأ يا جماعة ؟؟
ولا احنا مش بنهتم غير بامتحانات المدارس والجامعات وبس

ليه ليه يا جماعة احنا هُنا على ربنا أوي كده؟؟؟
عارفين ليه؟؟؟ بذنوبنا والله
تعالوا نرد على بعض :
كام شاب مسلم محافظ على صلاة الجماعة في المسجد ؟؟
كام مسلم من المليار بيحافظ على صلاة الفجر؟؟
كام مسلم مابينزلش صلاة الجمعة ؟؟
كام مسلم بيقدم الصلاة على ماتش الكورة أو الفيلم؟؟
كام مسلم مش عارف حقيقة عقيدته وأوامر دينه؟؟
كام شاب من شبابنا وبناتنا المسلمين في الشوارع والجامعات المصرية بيحافظ على غض البصر؟؟
كام مسلم بيقدم الصلاة على ماتش الكورة أو الفيلم؟؟
كام مسلم محافظ على ورد قرآن ثابت يوميا؟؟
كام مسلم ومسلمة طبعا ماشين على سنة النبي ؟؟
والقتل والسرقة والزنا والكبائر اللي بقت اسهل بكتتتتتتير من الصغائر عند كثيير من المسلمين
ها كفاية كده ولا أكمل .....
اسأل نفسك واسألي نفسك وانا معاكم لما نقف امام الله تخيلوا كده
ويجي واحد زي عبد الله بن حرام اللي اتقطع في غزوة أحد بأشلائه وأعضائه ويقول لله :هذا ما حدث لي فيك يارب ......... انت هتقوله ايه هتقوله عينك كانت منتفخة ليه؟
كنت سهران طول الليل بتفكر في اللي بتحبها وانتي هتقوليله ايه انا رجلي اتكسرت ليه ؟؟
أصلي كنت لابسة كعب عالي عشان افتن بيه الشباب؟؟؟
هنقول لربنا ايه يا جماعة ؟؟؟ليه كل واحد حاسس ان الموت بعيد عنه.....
النبي قال لنا " اكثروا من ذكر هادم اللذات " واحنا بنتناساه

أولا لما نأتي حوض رسول الله ليسقينا في يوم لا ظل فيه ولا ماء هيقولنا ايه هيقولنا أمتي أمتي
ولا سحقا سحقا
ده يترتب على حاجات كتير ...
انت فعلا كنت من أمته ولا البطاقة كان مكتوب فيها مسلم وخلاص ؟؟ انت عشت لدينه ؟؟ انت حملت الرسالة اللي هو عاش عليها؟؟
كان بيسمع اسمك في اللي بيصلوا عليه ولا ماسمعش اسمك قبل كده ؟؟
ساعتها هيظهر عليك اثر الوضوء ولا عمرك ما ركعت لله ركعة؟؟

بالله عليكم ماينطبقش علينا دلوقتي قول الله عز وجل : " فَخَلَفَ مِنْ بَعْدِهِمْ خَلْفٌ أَضَاعُوا الصَّلَاةَ وَاتَّبَعُوا الشَّهَوَاتِ فَسَوْفَ يَلْقَوْنَ غَيًّا "
عموما تفاصيل الحدث هكتبها في رد جديد ومعاه العلاج والمطلوب للي عنده استعداد يشيل
هم الدين ده

الحمد لله أن أحدًا فى المنتدى انشغل بقضية المسجد الاقصى و الحرم الأبراهيمى

لأنى قلبى يتفجر دماً بسبب أنى أرانى قد فقدت القدرة حتى على الشجب والإدانة كما حدثتكم


فى إذاعة يوم الخميس الماضى 4/3/2010 ثم أنى جعلت كاركارتير فى واجهة المنتدى لعل احدا يهامسنى ويشاركنى الإحساس بالقهر و............

ومع ذلك لنا امل فى المنتقم الجبار

ربنا لاتؤاخذنا بصمتنا وهيئ لنا شهادة فى سبيلك بالنفس أو بالمال أو حتى بالعلم

ايوة يا مستر طبعا احنا مهتمين وربنا يجزيك خيرا على هذا الكاريكاتير وعلى لفتك انتباهنا

دي صورة للمسجد الابراهيمي قبل اليهود ما يستولوا عليه





ودول بعد .......






ولا حول ولا قوة إلا بالله
اللهم اصلحنا لتصلح بنا آآآآآآآآآآآميييييييين

وبدأ العد التنازلى لهدم المسجد الأقصى !!!

ليس كلاما هذه المرة؛ ولكنها الحقيقة التى تقع فعليا على الأرض؛ فقد دعت أصوات صهيونية داخل إسرائيل بجعل يوم 16 مارس الحالى يوما لبدء العمل فى بناء هيكل سليمان المزعوم على أنقاض المسجد الأقصى المبارك !!!

فبعد الحفريات الإسرائيلية المستمرة تحت أساسات المسجد الأقصى الشريف التى جعلت المهندسون المعماريون يقولون عنه" أنه أصبح معلقا فى الهواء" بسبب إنشاء حكومة الاحتلال الصهيونية شبكة من الأنفاق تحت أعمدته وأساساته ؛ تقوم قطعان المستوطنين الإسرائيليين بحماية من جنود الاحتلال المدججين بالسلاح باقتحام باحات الأقصى الشريف لتدنيسه وفرض واقعا جديدا يمكنهم من الاستيلاء عليه.

وذلك عن طريق فرض حصار أمني عليه يمكنهم من إغلاقه فى وجوه المسلمين المصلين، وبالاعتداء على حراسه المقدسيين، الذين يتصدون مع الشباب المرابطين داخله لهذه الاقتحامات الاستفزازية العدوانية بأجسادهم التى تتلقى قنابلهم ورصاصهم؛ فيسقط منهم الجرحى والمصابين، وتسيل منهم الدماء الزكية فداءا للأقصى ودفاعا عن مقدسات العرب والمسلمين.

وأخذت الاقتحامات تتكرر بشكل شبه يومى ؛ بعد السرقة العلنية التي اقدمت عليها الحكومة الإسرائيلية من خلال إعلانها منذ أيام عن ضم مسجد "بلال بن رباح " ومسجد "الحرم الإبراهيمي الشريف" إلى مايسمى بـ:"قائمة التراث اليهودى" ؛ وكأن مساجدنا الشريفة صارت أماكن يتعبد فيها الصهاينة اليهود !!!

"الحرم الإبراهيمي الشريف" الذى شهد مذبحة وحشية على يد الصهاينة الإسرائيليون فى عام 1994 م عندما أفرغت عصابة منهم بقيادة المتطرف "جولدشتاين" رصاصات رشاشاتهم فى ظهور المصلين فور إنتهائهم من أداة صلاة الفجر؛ فاستشهد منهم 50 فلسطينيا على الفور،وأصيب مئات آخرون إصابات مختلفة .

" 30 شهرا فقط وتصبح القدس بكل مقدساتها يهودية " : هكذا تعهد الصهاينة الإسرائيليون؛ وبالفعل ينفذون مايقولون؛ وتسرق بيوت وأراضى الفلسطينيين فى القدس والضفة الغربية، ويطردوا منهابالقوة ليعيش الفلسطينيون المطردون من ارضهم فى العراء، وتهدم بيوتهم بآلآت الهدم الإسرائيلية ؛ ليأخذ الصهاينة المحتلون الأرض ويبنون عليها المستوطنات التى يزيد عددها يوما بعد يوم حتى كادت أن تبتلع كل القدس والضفة الغربية.

ويتزامن التهويد مع استمرار حصار غزة لما يقرب من 3 أعوام وحرمان أهلها من الخروج من هذا السجن الكبير الذى يسجن فيه مليون ونصف المليون فلسطيني ، الذين لم يكن لهم أى ذنب سوى تمسكهم بأرضهم واختيار الموت فيها على الركوع والتسليم للعدو الصهيوني المحتل.

كل يوم يأتى تستصرخ القدس العرب والمسلمين، وينادى الأقصى"أنقذوني قبل ان تفقدوني" ، وينادى أهل غزة المحاصرين " فكوا عنا الحصار.. أنقذوا مرضانا من الموت .. نعيش حياة لايرضاها البشر.." وللأسف ... ما من مجيب !!!

وللاسف لا تخرج ردود أفعالنا عن التجاهل تارة ، أوالتقليل من وقع هذه الكوارث اليومية تارة أخرى، و على أحسن الأحوال نشجبها على استحياء فنقول:"منهم لله، هو إحنا بس هنعمل إيه "!!!

فلسطين واجب الأمة، والأقصى مسجد المليار مسلم ونصف المليار مسلم علي امتداد العالم ؛ وليس مسجد الفلسطينيين وحدهم.

وعلينا أن نتذكر قول الرسول صلي الله عليه وسلم :" المسلم أخو المسلم لايظلمه ولايسلمه ولايخذله" وهذا الحديث يجعل نصرة إخواننا فى فلسطين المحتلة واجب ديني قبل ان يكون تدخل انساني يفرض علينا أن ننتفض من أجلهم؛ ليعلم الصهاينة أن للأقصى حراسا فى كل مكان؛ وأن للفلسطينيين إخوان
ولنعلم يا أحبابي ان اليهود واعني لفظة اليهود- وليس إسرائيل -
بعد كل عدوان او اقتحام اوأية فعلة شنعاء مما يقوموا به في تلك الارض الطاهرة ينتظروا ردود أفعال
العرب ....يشوفوا الناس لسة حيه ولا ماتت عشان يكملوا اعتداءاتهم أو يرتعدوا ويهدئوا من حدة أفعالهم ليجدوا ........عارفين بيجدوا أيه؟

نشجب ........ ندين .......... نرفض ........ لا نقبل أبدا
ويالها من كلمات تزلزل القلوب : قلوب اليهود تزلزلها من السخرية من حال هؤلاء العرب
وقلوب من يهمه الأمر من العرب والمسلمين تزلزلها من الحزن والاسى على ما وصلنا إليه
وتأتي المرات والمرات بحوادث هي أفظع مما سبقها وكأنهم بيقولنا اضربوا دماغكم في الحيط.

إن شاء الله للحديث بقية بس يعني في ملاحظة صغيرة :
وهي ان الموضوع ده عشان يلفت نظر اخواني واخواتي من شباب المنتدى ومع ذلك لم أجد الاهتمام إلا من مستر عيد وهو معلمي ومنبهي وفي غنى عن هذه الكلمات ربنا يبارك فيه ويحفظه
فيا شباب فيه حاجات كتير أهم من الكرة والافلام وعمرو دياب فأرجوكم انتبهوا قبل فوات الاوان
وليعلم كل منكم أنه على ثغر من ثغور الإسلام فلا يؤتين من قبله

ربنا يجزيكى خير ولازم نعمل حاجه لو كل واحد قال مفيش فى ايدى حاجه هنفضل كده لازم نتحرك ولو بأقل القليل بموضوع او بنشر الخبر فى كل مكان او بالدعاء لربنا سبحانه وتعالى انه ينصرنا بس لازم من جوانا يبقى عندنا المبدأ والروح والدافع ان اننا نصلح المهزله اللى بتحصل قدامنا ده دين الاسلام ربنا قادر على كل شىء بس دى الارض اللى امرنا نحافظ ونعمر فيها وده ابتلاء وامتحان من الله لازم نفكر ونبذل قصارى جهدنا عشان نعرف هننجح فيه ازاى والله المستعان