--------------------------------------------------------------------------------
احم احم ثم احم
قد تتناثر علينا الاتربه...في اعبقه الانوار...وتتلاشى الخزعبلات...في حلقات مفرغه من الملازمات...فهل نحن من قوم احبوا المعتلات...ام قد انتهينا ولا هم يحزنون(بخصوص يحزنون..احم)
بالذمه ماقلتوا شسالفه؟؟؟
ما استغربتوا اني اكتب بالفصحى...عشان تعرفون بس...يبا لكتبنا كتبنا...(ولا كلمه راكبه مع الثانيه ولا جمله لها معني...يقول اعرف...عطه فورورد بس فورورد..احم)
بس نصيحه اقروها كنكم تقدمون برنامج الاتجاه المعاكس ترا تصلح...احم
حبيت اتفنتق شوي....المهم
ندخل في الموضوع....
اليوم جايب لكم موضوع حساس...جدا جدا حساس
مانطول في المقدمات...(كفايه اللي كاتبه فوق..احم)
وراح تعرفون الموضوع من الامثله
الامثله..اسمائهم فلان وعلان...وكل مثال موضوع لحاله...(للتوضيح فقط)
فلان...بعت مسج لعلان...علان كان مشغول وقتها...قرى المسج...وقال لما اخلص بارد على فلان...فلان للحين ينطر...علان خلص من شغله...وانشغل بشي ثاني...فلان يقول وينه علان ليه للحين مارد علي...علان نسى موضوع فلان والمسج...فلان يقول...مادري ابعت له مسج ثاني ولا تصل فيه؟؟...لا لا يبا كيفه مارد علي...ماراح اتنزل ابعت له او اتصل به مره ثانيه...علان...ساااهي ومشغول ومايدري عن شي...
فلان منبطح على السرير...يلعب الجوال...يشيك على الاسماء...قري اسم علان من زمان ما كلمه...امممم عطه مسح...ليش؟؟...يبا من صجك...لا يبعت مسجات ولا يرن...ليه احتفظ برقمه...مسوي لي زحمه...علان دايما يبعت مسجات ويتصل لفلان لكن محد يرد...علان عنده الرقم القديم لفلان...
فلان...قاعد في السياره ينتظر...قاعد يشيك على الرسايل...قرى اسم علان...حن قلبه...وتذكر سوالف وعلوم مع علان...قال خلني اتصل به...هون...وقال...دامه مايتصل خله يولي...ماراح اتصل به...كرامتي وعزتي ماتسمح لي اتصل...علان...مشغول في الدنيا ولاهي...ويمر في ظروف صعبه...ويبغي وقفة خوي معاه...
قاعدين في مجلس...ضحك سوالف...جا طاري علان...واذكروه بالخير...فلان انقلب وجهه...وقام ينقد في علان...ماعليكم منه تراه عيار...ومن تحت لتحت...قدامكم يسوي نفسه انه رجال...وماتدرون من وراكم وش يسوي...علان رجال فيه الخير...يتصل على الشباب لكن علاقته مع فلان مش ذاك الزود ومايتصل عليه...
حيالله فلان...يحييك ويبقيك...اخبارك مع علان...خله يولي زييين...افا ليه...يبا قاطع هذا...لا يسأل عن حد ولا شي...شايف نفسه على وشو...جاته كم بيزه سوى نفسه تاجر...لاني باتصل به ولا ابغي اكلمه...ترن ترن...هلا ومرحب...فلان...من علاااان؟...اي علاان اخبار علووووم...يالله حيهم علاااان عاش من سمع صوووتك ياولد...حيالله ذا الرجال...وينك ياخوي ماتبين...اشتقنا لك...مشتاق لك اكثر يا فلان.."بثانيه طاح حطب شهور"
فلان...هلا...جاك مسج...اي اي ياخي هذا من واحد مزعجني غثييييث ياولد...كيف؟...دايما يتصل يسأل...ويبعت مسجات...ملوع كبدي...لزقه لزقه مايفج...هو رجال طيب وفيه خير...اووه اشوفك ماسك الجوال...بترد عليه بمسج...لا لا من صحبك...ها اجل ليه؟...خويي الروح بالروح ولزيمي صار لي 3 شهور ابعت له مسجات كل يوم واتصل عليه ومايرد علي حتى مره شفته في مجمع اصوت عليه فلان فلان سافهني؟؟!!!
الووووو...حبييييي فلااااان...هلا ومرحب علان...اخبار يا عديل الروح...طيب الله يسلمك...ياخي انت حبي الوحيد...يا مرحبا بك...بغيت سلف 2000 ريال...تامر امر...طيب دامه راعي مصلحه ليه ما تسفهه؟؟؟...شاسوي خويي ويعزني...متى اخر مره قعدتوا مع بعض؟؟...من 4 شهور...لانه هو دايما يسافر سياحه...فا ما اللومه...تعال الا اخبار اخوك؟؟...مادري عنه...متى اخر مره كلمته؟؟ يمكن سنه...انت قاطعه؟؟؟...لا لا بس...مره وحده جاني قال لي محتاج ابغي فلوس...عشان عياله...ماقمت اتصل فيه ولا ارد عليه...ياخي هالناس مايتصلون الا حق حااااجه!!!!...
فلان قاعد يختار اسماء للي بيبعت لهم مسج العيد...امممم لا لا هذا خله يولي ماعمره بعت لي مسج...لا لا هذا ماراح ابعت له لانه مابعت لي مسج رمضان...لا لا هذا مسجاته سخيفه مايعرف يبعت شي عدل...لا لا هذا لما انا بعت له مره وحده مسج الجمعه مارد علي...لا لا هذا وهذا...لا لا هذا وهذا...يالله خلصنا...بابعت الحين وعسي ربي يكتب لي اجر اللي يباركون للناس في العيد ويشاركونهم فرحتهم؟؟!!
فلان قاعد في المكتب يتعبث بالجوال...ها فلان مسجات ها يالتعبان...لا لا من صجك قاعد اشوف الارقام...وش تفكر فيه...واحد كان من اعز الناس لي وكان خوي روووحي صار لنا 10 سنين ربع...طيب الحين...صار لي فوق السنه ونص ماكلمته...ليييه؟...بعت له مسج مارد علي من ذيك السنه...ومايبعت لي مسجات لا حق عيد او غيره...وكان في سوء تفاهم بسيط...
ترن ترن...هلا ومرحب...فلااان...هلا...عظم الله اجرك في علان...وشو؟؟؟ شتقول انت...اليوم علان توفى في حادث...لا لا مستحييييل...تعوذ من ابليس يا فلان...مايصير مايصيرررر...صار لي سنه ابغي اشوفه ماشفته بس عشان ما اتنزل واتصل فييييه...مشتاااق له...ابغي اقعد معااااه...ابغي اشووووفه...
فلان الحين ماراح ينفعك الندم...دام شي كنت تقدر تسويه وهو حي ليه ماسويته؟؟؟
انفعتك كرامك؟؟؟ انفعتك عزتك؟؟؟ انفعك كبرك وغرورك؟؟؟ في وصلك وقربك وسؤالك؟؟؟
تخيل لو كان علان
امك ابوك اخوك اختك عمك عمتك...هلك جماعتك ربعك
طبعا ماتسوي عليك...
لو تفكر فيها تراها كبسه زر وحده...وكم كلمه تطيح فيها حطب حتى وان كان مبني من سنين...ترا الكلمه الطيبه صدقه...وتشرح الصدر...والسؤال عن الناس يفرحهم...ويحسسهم بالانتماء والاهميه والوصال...
لا تكبرووون المواضيع في راااسكم...وتقولون ليه وليه وليه...ياخي خذ الجوال واتصل...لا تفكر واجد...لا تقول ياخي هو يبغيني خله يتصل او ماني بقاط نفسي عليه...انت سو اللي عليك واللي يرضي ضميرك ويريحك والباقي على الله...وصدقني انت الربحان في النهايه...
ودايما تعذر لخويك الاعذار...واحسن الضن...ولا تاخذ الاحكام من تصرف واحد او اثنين...خلك حكيم وعاقل...
اتمنى رسالتي اوصلت...
الموضوع شوي طويل...بس لازم يكون كذلك...
وهالكلام اوجهه لنفسي اولا...عسى ربي يصلحنا يارب...واقدمها لكم عسى ربي يصلح احوالنا ويجعلنا من اللي يوصلون الناس بالخير يارب...
منقول
