حد عاقل يرد عليا !!!

بعتذر عن عنوان الموضوع و طبعا كل اللي في المنتدى ناس عاقلة

بس انا بقى اللي قربت اتجنن من اللي بشوفه

بقى ياناس الدراسة والكليات هي سبب انتشار المرض المعروف وعايزين يأجلوهالنا عشان يفتحوا ابواب الدروس الخصوصية اكتر واكتر ؟؟؟؟

والناس اللي في كليات عملية دي تعمل ايه في نفسها ؟؟؟؟

وفي نفس الوقت :

1/ كأس العالم للشباب اللي جاب لنا أجانب من كل حته آمن وليس منه ضرر

2/ ومباريات كرة القدم (الحدث العالمي 00 غزوة استاد القاهرة اللي هتحصل يوم السبت دي )
برضه مافيش فيها مشكلة

3/ وكله كوم والسينمات والمهرجانات السينمائية وتكريم الابطال اللي شرفونا في رمضان كوم تاني

إزاي تتلغي يعني ؟؟؟؟ أمال عقول الشباب تتخرب إزاي ؟؟

كل ده وما خفي منه والدراسة والجامعات هي اللي عامله لهم أزمة

مش خلاص المصاريف اتدفعت والكتب اشتريناها يبقى لازمة المدارس والجامعات أيه ؟؟

أرجوكو يا جماعة لو انا فاهمة غلط حد يفهمني الصح يمكن أكون ظالماهم وده اللي انا بتمناه 000000

والله أنا من وجهة نظري أن الموضوع هيبقى خطير في أيام الشتاء وتأجيل الدراسة ضرورة
ومش شايف إن الإجازة هتأثر على موضوع التعليم في مصر فالتعليم في مصر والحمد لله حافظ مكانته من العشرة الأواخر وده مرتبة ميتخفش عليها أبدا المهم حياة الطلبة.
وبالنسبة لعقول الشباب الجامعة مبتشكلش عقولهم أنت فاهمة غلط اللي بيشكل عقولهم الإعلام والأغاني والأفلام والموضة والأصدقاء والانبهار بالعالم الغربي إلا من رحم ربي
فالشباب عاملين حسابهم لأي ظروف علشان كده مبيتعلموش من المدارس والجامعات ده إذاكان فيها تعليم شوفي مستوى المدرسين والمهندسين والأطباء وغيرهم (على فكرة أنا مدرس) وأنت تطلبي بإلغاء التعليم مش تأجيله
رجاء الرد

اشكر العضو الوحيد اللي رد عليا ولسة عندي أمل ان الاعضاءيدخلوا

"وبالنسبة لعقول الشباب الجامعة مبتشكلش عقولهم "

انا ماقصدتش الجامعة انا قصدت الإعلام
يعني انا اقصد ان إلغاء السينمات والمهرجانات هيقف ضد السياسة الخارجية لتدمير عقول الشباب وعشان كده ماينفعش تتلغي وهو ده المعنى اللي حضرتك بتتكلم فيه

وانا فاهمة كويس برضه ان مفيش تعليم أدبي في مصر إلا بعض الاستثناءات اللي إحنا مش عاريفنها لحد

دلوقتي لكن التعليم العلمي إلى حد ما متماسك وممكن حضرتك تنزل جامعة
عين شمس وتقارن بين كلية زي كلية (طب ) وبين آداب أو حقوق أو تجارة ( وياريت ماتفهمش غلط في الجزء ده انا مش بعيب على الكليات نفسها لأن العلوم كلها ذات أهمية لكن بعيب في معظم وليس كل طلبة هذه الكليات )
لكن حضرتك ممكن تقولي انا أو طلبة كلية علوم أو صيدلة يعملوا ايه في حالة تأجيل الدراسة وإلزامنا بالمناهج

كما هي00 يعني نعمل ايه في سكاشن العملي في مادة زي التشريح مثلا 00 وبتوع سنة رابعة و خامسة
سادسة يجيبوا حالات منين يدرسوا عليهم ؟؟؟



وبعدين انا مش بعيب قرار التأجيل لذاته بقدر ما بعيبه بالنسبة لوجود الظواهر اللي انا قلتها فوق زي :

المباريات والسينمات

أنا ممكن اقترح بعد التوضيح الجميل ده إن يتم تقييم شامل للدراسة وتحديد أهمية الحضور من عدمه في مراحل التعليم جميعا وبعد ذلك ممكن نعطي للكليات والفرق الدراسية اللي مش هتفرق معاها الحضور إجازة فنقلل بذلك من الزحام ونقلل من نسبة الخطورة ما رأيك في هذا الاقتراح؟

طبعا موافقة واقتراح جميل بس للأسف الامر مش بأيدنا إحنا