..عيش أحلي ما في اللحظةII.....

تحية طيبة لكل احبابنا أعضاء منتدانا الحبيب
بالتأكيد في مصرنا لحظات بعضها جميل وبعضها غريب وبعضها حزين
وطبعا علينا أن نعيش أحلي ما في هذه اللحظات

يعني ........

لو في مره ماشي في الشارع ولقيت طوابير العيش منتشره في كل مكان
عادي استمر في المشي ولا كأنك شايف حاجه ...وعيش أحلي ما في اللحظة

لو مرة بتتفرج علي التليفزيون وسمعت الملايين التي تصرف علي لاعبي الكرة والمطربين
وانت وغيرك مش لاقي مسكن ملائم وعارف إن أكثر من نصف الشعب المصري تحت خط الفقر
إوعي تزعل ولا تكتم في نفسك.... وعيش أحلي ما في اللحظة

لو مره وقعت عينك علي علبة كبريت وشفت كلمة ( صنع في الصين ) وحاولت بعدها
تفتكر انت مشفتش من إمتي عبارة ( صنع في مصر ) علي منتج
لازم تلوم نظرك الضعيف اللي مش لاقي كلمة مصر في معظم الصناعات وبرده..
تعيش أحلي ما في اللحظة

لو مره وانتي ماشيه في الشارع اتعاكستي او انت اتعاكست
عادي كده إتأكدت انك حاليا في مصر ... وضرور تعيش أحلي ما في اللحظة

لو في مره دماغك وجعتك شويه وطلبت معاك نكد وقلبت علي قناه إخبارية
وشفت إخواننا في فلسطين والعراق و ..و ... يقتلون وتدمر منازلهم ويستغيثون
ولا حياة لمن تنادي
إعرف وقتها إن النخوة والشهامة العربية إنتهت
وبرده عيش أحلي ما في اللحظة

لو مره كنت طموح شويه وحبيت تستمر في التعليم محاولا الوصول إلي درجات علمية كبيره ومتوقعا
أن تمد لك الأيادي لتساعدك كما دائما يقال ثم تفاجئ بأن هذه الأيادي الممدودة لتجذبك الي الخلف لا الأمام وتضع أغرب العقبات لإيقافك
ولا يهمك بتحصل ... وحاول تعيش أحلي ما في اللحظة

لو ظروفك
السيئه جعلتك مضطرا إلي التوجه لمصحله حكومية لقضاء مصلحة ما وشاهدت
الرشاوي والفساد منتشر أمام عينيك وسمعت من يقول لك أن هذا هي ثقافة وحال
بلدنا اليوم
اوعي تتنرفز .... وعيش أحلي ما في اللحظة

هذه بعض اللحظات التي أتمني ان نعيش أحلي ما فيها
لكن أتمني ألا يكون أحلي ما فيها لحظات سوداء تعبر عن واقع مؤلم
كما أتمني ألا تستمر هذه اللحظات طويلا وأن نستيقظ من سلبيتنا وثباتنا العميق
كما انبه أن هذه لحظاتي التي تشغلني فما هي لحظاتك أنت .....

تحياتي للجميع

أجمل ما فى اللحظة
أسلوبك اللاذع يا أبو صلاح
...........

تلميذك يا استاذى شكرا لك ونورت

جميل بس هنفضل لحد امتي نسكت ومش نعلق

لحد ما القيادة تفوق وتعرف ان احنا ماشيين غلط نحاول نلم حطام حضارتنا احنا كنا سادة بالادارة الجيدة
فلما كان هناك سوء ادارة كان هناك واقع مرير نعيشه الان
وطول ما فى فالبلد شباب بجد يبقى فى امل
فشبابنا هم أمل الحياة