عفوا الشباب المصري غير متاح حاليا.., من فضلك اعد المحاولة مرة اخرى

هل أنت لاقدر الله مثقف؟؟

هل فكرت وغامرت واتهورت مرة وقريت كتاب؟؟

بتقرا حاجة غير مجلة ميكي ؟؟

عندك مصدر بتجيب منه معلومات غير قعدة القهوة و الكافتريا

واللف مع صحابك ع الكورنيش ؟؟

تعرف يعني إيه حزب؟؟

هل تعلم ماهى الليبرالية والفدرالية والإشتراكية ؟؟

يا ترى بتدخل ع النت ليه؟؟ عشان تتثقف؟؟

إذا كانت معظم إجاباتك هى ( لا ) لا تقلق عزيزي الشاب أنت طبيعى 100% ولا تحتاج إلى أي تحاليل أو إشاعات

فكل الدراسات والأبحاث تشير إلى أن الشباب المصرى عليه العوض و منه العوض
وهو في أسوأ حالاته الثقافية في ظل أزهى عصور الحرية والديموقراطية
والتقدم .......!!

- يعني احنا شباب تمام .... في العصر التمام -

انا لاقيت الاحصائيات دى ع النت و قولت لازم انقلها علشان تكمل فيها يمكن لعل و عسى يحصل تغير ( لا قدر الله )

حيث تشير إحدى الدراسات إلى أن:

80% لا يقرأون الصحف و70% من الشباب الذين يشاهدون التلفزيون..أنهم يفعلون
ذلك بدافع الهروب وقتل الوقت وتحتل البرامج الدينية المرتبة الأولى في
قائمة البرامج التي لا يهتم الشباب بمشاهدتها بنسبة 64% - لا شباب متدين
صحيح -

أما في الصحافة

الصفحة الأولى التي يهتم الشباب بقرأتها هى..صفحة "الحوادث" تليها "الصفحة الرياضية"

..وإذا كانت علاقة الشباب بالإعلام كأحد مكونات المجتمع المصري تبدو ضعيفة..فإن علاقته بالمؤسسات السياسية تبدو مصيبة..

ففي البحث الذي أجري عن ثقافة الشباب المصري ذكر أن 10% من الشباب لا يعرفون بوجود أحزاب فى مصر من الأساس- يا حلاوة!! -

و الكارثة بجد هى وجود أكثر من 74 % من الشباب لا يعرف اسم أول رئيس للجمهورية - محمد نجيب يعني -

وذكر أيضاً أن 19 % يظنون أن مصر فيها حزب واحد فقط - أكيد قصدهم على حزب
النادي الأهلي - بينما أكد 17% من الشباب أن عدد الأحزاب في مصر هو ثلاث
أحزاب..وأكتشف البحث أن 50% من الشباب لا يعرفون عدد الأحزاب الموجودة في
مصر..مع العلم أن بها 22 حزب (يا ترى أنت كمان كنت عارف؟؟ ولا انت من
الــ50%) _ على فكرة انا منهم

( مع إن الأحزاب في كل بلاد العالم تعتمد أصلاً على الشباب بشكل أساسي..ويستطيع الشباب من خلالها إقامة واسقاط الحكومات

فنجد أن الشباب الأوكراني وبالتحديد طلبة الجامعات هم الذين أسقطوا النظام الديكتاتوري في أوكرانيا من خلال ثورة شعبية أقامها هم

وهذا هو نفس سبب سقوط الحكومة في فرنسا حينما قام طلاب الجامعة هناك
بمظاهرات حتى أسقطوا الحكومة عندما قدمت قوانين للعمل لا تناسبهم.. )

طب تعالوا نشوف ازاى الشباب المصرى بيستفيد من الانترنت

فحسب تصنيف مؤسسة أليكسا العالمية عن أكثر 100 موقع يدخله المصريون كان
ترتيب هذه المواقع هى مواقع الشات..والمواقع والمنتديات الجنسية ثم مواقع
تحميل الأفلام ومواقع نوادي الكرة ومواقع النغمات والبلوتوث ولم تشمل هذه
القائمة سوى 4 مواقع إسلامية في حين أنها لم تشمل على أى موقع علمي!!!

لكن الكارثة الكبرى هى أن مصر تحتل المركز الثاني في قائمة أكثر 10 مناطق
فى العالم بحثاً عن المواقع الإباحية على شبكة الإنترنت وفقاً لتصنيف محرك
البحث جوجل !!..

فى وقت إن ناس غيرنا وشباب غيرنا هم اللي بيستفيدوا بمليارات الكتب والمعلومات الموجودة على الإنترنت .. ( عشان كده بيتقدموا.. )

فنلاقي مثلاً إن الهند تحتل المركز الأول على العالم فى البحث عن
البرمجيات وده يفسر لنا ليه الهند هى الأولى على العالم فى صناعة
البرمجيات الآن؟؟

طب و بعدين ايه اللى حصل

اللى حصل بقى ان الكلام ده قلق ناس جامد وعارضوه بشده فقالوا لازم يطمنوا
ويتعاملوا مع الواقع وبلاش كلام الاحصائيات الخايب ده ورفعوا شعار عمار
يامصر و بلدنا لسه بخير و عايزنها تبقى خضرا ولازم يطمنوا علي الأرقام دي
بنفسهم.. وعلى الشباب الجامعي المثقف..

فنزلوا للجامعة ( جامعه القاهرة ) وعملوااستطلاع لعينة عشوائية من طلاب الجامعه

( 20 طالب )

وكانت النتيجة ان معظم الطلاب 17طالب يستخدمون النت للشات

( مش لحاجه تانيه خااااالص لا سامح الله )

وإن 15 طالب لا يقرأون إلا الكتب الدراسية ( ده إذا كانوا بيفتحوها أساساً )

ونسبة قليلة 3 طلاب يقرأون الروايات الأدبيه العظيمة مثل رجل المستحيل وملف المستقبل

( الحمد لله أهو لقينا حد بيقرا حاجة ) ..

طبعاً مش لازم تبقى محمد حسنين هيكل..ولا لازم تكون فهمي هويدي

( مصيبة لا تكون مش عارف دول كمان )

لكن على الأقل تكون فاهم.. وعارف .. وداري باللي بيجرا حوليك

فاهم العالم ماشي إزاي ومين عايز إيه؟؟

ومين بيعمل إيه عشان يكسب إيه؟؟

و مين كويس و مين وحش ؟؟

وقبل كل ده تكون عارف كويس..أنت عايز إيه؟؟

لأن فعلاً جهلنا ثقافتنا في كل شئ خلانا أمة نايمة مش بتفكر ولا عايزة تفكر

.. دماغنا فاضية

.. مفيهاش أي حاجة

.. ولا أي قضية

.. ولا عايشين لهدف

.. وكل اللي نعرفه في حياتنا .. وكل معلوماتنا .. عن الممثلين والكورة

.. حتى ديننا منعرفش عنه إلا الوضوء والصلاة اللي اتعلمناهم واحنا صغيرين

.. فحين إن العالم كل بيتقدم بسرعة جنونية .. واحنا لسه محلك سر !!

.. يا ترى الفكرة وصلت؟؟ولا لسة؟؟

وملحوظه بسيطه بقى نسيت اقولها تبع الاحصائيات دى برضه

هاري بوتر هو اللذي اعاد الشباب المصري لقرائه الكتب وهو الكتاب اللي حقق اعلي مبيعات في مصر

بعدها تيجى سلسله كتب تفسير الاحلام و حظك اليوم و الابراج

معلش هو موضوع احتمال طبعه هجومي بس واقع ومش هيعجب

كتير ومش هلاقى عليه ردود بس برده نزلته المعرفة بالشئ ولا

الجهل بيه .

منتظر الردود والاراء

تحياتي

موضوعك رائع واكيد هيفيد ناس كتير جدا ويغير افكارهم بس انا عاوزه اعرف انت ليه خصيت الشباب بس بالموضوع ده ولا انت قصدك سن الشباب عامة فى مصر كلها اصل برضه فى بنات كتيييييييييييير بنفس المواصفات دى بس بعا مع اختلاف الاهتمامات بالنسبه لهم وانا من رأييى ان المفروض الموضوع يكون فى اراء ومناقشه كتير وميواجهش هجوم بالعكس ده الواقع دلوقتى ولازم نتحرك ونغيره التغييييير للاحسن اول خطوه ايجابيه فى حياة البنى ادم شكرا على الموضوع الرائع ده

» لحظة من فضلك
» توقف للحظه من فضلك
» عفوا رصيدك الحالي لا يكفي لإتمام هذه المكالمة
» لحضة يامسلم من فضلك ضرورى
» غرائب الشارع المصري